Техникалық және кәсіптік білім беру немесе жоғары оқу орындарын ауыстыру

ЖОО ауыстыру рәсімі

Егер Сіз Қазақстан Республикасы жоғары оқу орнының студенті болсаңыз, ауысуға рұқсат етіледі:

• курстан-курсқа – жазғы семестрді ескере отырып, жазғы емтихан сессиясының қорытындысы және қол жеткізген ауысу балы бойынша. Білім грантымен оқитын студент академиялық қарызы болған жағдайда оны ақылы негізде жояды. Құнын жоғары оқу орнында нақтылау қажет;
• сол жоғары оқу орнында бір мамандықтан басқасына – тек ақылы негізде оқи отырып;
• бір жоғары оқу орнынан басқасына сол мамандық бойынша – ақылы негізде білім алушы, сондай-ақ мемлекеттік білім беру гранты бойынша білім алушы ретінде (жоғары оқу орнының өзінен грант алған студенттерге қатысты емес). Ақылы негізде білім алушыны бір жоғары оқу орнынан екіншісіне ауыстыру кезінде, студент пен қабылдаушы жоғары оқу орны арасында шарт жасалады;
• білім беру гранты бойынша білім алатын студент білім беру грантын сақтай отырып, басқа жоғары оқу орнына ауыса алады;
• ақылы негізден – мемлекеттік білім беру тапсырысы бойынша оқуға ауыстыру.

ЖОО-ды оқуды қаржыландыру көзі шеңберінде ауыстыру шарттары

Білім гранты (тегін) бойынша

Егер cіз білім беру гранты бойынша оқитын болсаңыз, мыналар қажет болады:

1. Жоғары оқу орны басшысының атына ауыстыру туралы өтініш беру және мөрмен бекітілген, аударым туралы жазбаша келісім алғаннан кейін, қызықтырған жоғары оқу орнының жетекшісіне жүгіну;
2. Қабылдаушы жоғары оқу орны басшысының атына жазылған ауысу туралы өтінішке мыналар қоса тіркелуі тиіс:
• оқу ісі жөніндегі проректордың және офис-тіркеуші қол қойған, мөрмен бекітілген транскрипт, академиялық анықтама көшірмесі;
• білім беру гранты иегерінің куәлігі.
3. Ұсынылған құжаттардың негізінде факультет деканы (институт директоры) оқу жоспарларындағы пәндер айырмашылығын анықтайды және меңгерілген пререквизиттерге сәйкес оқу курсын белгілейді, білім беру бағдарламасына сәйкес меңгерілген кредиттерге қайта сынақ жүргізеді және білім алушының жеке оқу жоспарын бекітеді.
4. Оқытудың күндізгі және кешкі нысанында білім алушылардың ауыстыру және қайта қабылдау туралы өтініші білім беру ұйымымен қабылданған кезекті академиялық кезең басталғанға дейін бес күн ішінде жазғы және қысқы демалыс кезеңінде білім беру ұйымының басшысымен қаралады.
5. Оқытудың сырттай нысанында білім алушылардың ауыстыру және қайта қабылдау туралы өтініші бір ай ішінде, бірақ білім беру ұйымымен қабылданған кезекті емтихан сессиясы басталғанға дейін бес күн бұрын білім беру ұйымының басшысымен қаралады.

Ақылы негізде

Заңнамаға сәйкес, білім алушыны курстан курсқа, бір мамандықтан екіншісіне, бір оқыту нысанынан екіншісіне, бір жоғары оқу орнынан екіншісіне ақылы негізде ауыстыру және қайта қабылдау рәсімі жоғары оқу орнымен дербес белгіленеді.

1. Бұл ретте білім алушының жеке ісінде мыналар болуы тиіс:
• ҰБТ немесе КТ тапсыру туралы сертификат - бакалавриат үшін;
• түсу емтихандарын тапсыру туралы сертификат - магистратура үшін.
2. Оқытудың күндізгі және кешкі нысанында білім алушылардың ауыстыру және қайта қабылдау туралы өтініші білім беру ұйымымен қабылданған кезекті академиялық кезең басталғанға дейін бес күн ішінде жазғы және қысқы демалыс кезеңінде білім беру ұйымының басшысымен қаралады.
3. Оқытудың сырттай нысанында білім алушылардың ауыстыру және қайта қабылдау туралы өтініші бір ай ішінде, бірақ білім беру ұйымымен қабылданған кезекті емтихан сессиясы басталғанға дейін бес күн бұрын білім беру ұйымының басшысымен қаралады.

Оқу орындарды ауыстырудың басқа түрлері

Шетелдік жоғары оқу орнына ауыстыру рәсімі

Қазақстанның жоғары оқу орнынан шетелдік жоғары оқу орнына студентті ауыстыру кезінде мынаны ұсыну қажет:

• меңгерілген оқу бағдарламалары туралы құжат – академиялық анықтама, транскрипт;
• «Азаматтарына арналған Үкімет» МК бөлімшелерінде немесе Академиялық жұмылғыштық және Болон үдерісі орталығында (https://enic-kazakhstan.kz/kz/about/structure) нострификациядан өткен, білім берудің алдыңғы деңгейін аяқтағаны туралы құжат.

Бір техникалық және кәсіптік білім беру орнынан басқасына ауысу

• оқу орны басшысының атына ауыстыру туралы өтініш беру;
• мөрмен бекітілген, ауысуға жазбаша келісім алғаннан кейін сізге өтінішпен және сынақ кітапшасының көшірмесімен (оқу мекемесінің басшысының қолымен расталған) қызықтырған колледж басшысына жүгіну қажет.

Ауыстыру рәсімдері туралы қосымша ақпаратты жоғары оқу орындарының деканаттарынан білуге болады. Қазақстанның жоғары оқу орындарының байланыстарын мына жерден көре аласыз: https://egov.kz/cms/kz/articles/2Fvusi_rk